■睇真啲，呢個場嘅客路質素真係一啲都唔弱。
■呢個場最大嘅優點係，男女比例十分之平均，抵讚！
出嚟蒲開都知道，太子係酒吧嘅集中地，淨係一條通菜街，閒閒哋都有幾十間酒吧，雖然選擇多多，但在下由始至終都係對「 BC Lounge」情有所鍾，原因係呢度有個超玩得嘅女經理阿清，雖然阿妹猜枚、飲酒拍馬都未係我嗰皮，但勝在夠虛心又有酒膽，就算連環輸十幾鋪大話骰，都一樣笑瞇瞇咁派彩，絕唔會閃酒，所以好多時我哋 Order一打啤酒，有半打以上係落咗佢個肚度，出嚟玩最緊要開心，邊個飲又有乜所謂先？
拳手好勇鬥狠
唔知大家仲記唔記得在下有個老友住喺東涌，無錯，佢就係東涌城，無端端做乜要提起呢個人？皆因佢係呢間酒吧嘅常客，就算住到咁遠，一聽到落呢間酒吧玩，就即時舉手報名 Join我哋個 Party，原因係：「呢間酒吧價錢平過老尖一截，就算飲醉咗，打的歸家都有着數！」係嘅、係嘅，要出嚟玩就一定諗到理由嘅，一場兄弟，當然撐到你上天花板。既然咁抵玩，今日係大眾牛一，張單就……多謝東涌城先。
呢間酒吧除咗有阿清呢個勁 Wet得嘅女經理坐鎮，其實都有唔少好勇鬥狠嘅拳手，不過班靚女就比較怕醜，講到口水都乾都唔肯上鏡畀個真身大家 See吓，原因係：鬼咩？ Happy hour時刻已經隻隻都片到面紅耳又赤，個個關公上身咁，就梗係唔願上鏡啦！明白嘅。
■呢度嘅客路相當唔錯，斯文得來又夠晒親切，我鍾意。
■星星都未出齊就已經飲到面紅耳又赤，片酒氣氛絕對一流。
咁先飲得痛快
點解呢個場 Happy hour時刻就已經咁好景，因為呢度 4:00pm-8:30pm時刻所有啤酒都係 Buy one get one free，即係$168有一打啤酒，除開條數十幾蚊就有支啤酒，真係同大牌檔差唔多價位咋！
大酒方面，基本上飲開嗰兩隻牌子嘅威士忌都係$680就有交易，仲要係全包宴嗰隻，我就覺得呢個價錢都算幾公道。
除此之外，呢個場仲有一部 100吋大投射，再加埋 10部 LCD大電視，真係任何角落都睇到電視，難怪落嚟呢度玩嘅人，有一半以上都係為睇波而來，氣氛真係夠晒 Very good。
■全場有 10部 LCD電視，包保睇波睇得一清二楚。
■ 100吋大投射坐鎮，令到呢個場嘅睇波氣氛加分唔少。
地址：旺角通菜街 220號地下
