裝修方面， L形場格局，白色梳化椅配雲石枱，坐得舒服；大吧頭對開係射鏢區，鍾意嘅歡迎露兩手；再唔係嘅搵拳手猜兩板，拳腳兵器瓣瓣掂，入得場預咗醉住走。
捉靚女 Sugar問佢最愛賀年食品，佢話：「大白兔糖！今年係兔年，覺得更加好味。同埋，你有無發覺，硬係過年過節大白兔糖先會蒲頭。」講落又係喎，不過呢個問題毋須深究，大家想知嘅，當然係酒水收費，聽住嘞。
Happy hour每 Set啤酒$120， Normal hour就$195，大酒每支$850。老實講唔算平，但絕對稱唔上貴，如果大班朋友一齊撐場，當然 Join任飲着數啲，周日至四，男$280，女$180；周五、六，男$280，女$200，一個價錢飲到尾，飲飽走人，人頭計數乾手淨腳，唔使拗數免煩，係咪咁講先？
■吧頭唔算大，不過靠近鏢機好方便。
■雖然過咗新年，但一樣好有氣氛。
■上牆電視夠大部，最啱睇波或唱 K。
■地方唔大，不過就好舒服。
（地址：尖沙嘴寶勒巷 10號 1樓）
