■知嘞、知嘞，知你成日贏鏢嘞！
■咪以為斯文靚女就蝦得呀，掟鏢技術真係估佢唔到 o架。
哈哈，其實又唔怪得晒我哋班男人，事關家陣夜蒲界又再興番掟鏢呢個玩意；正如之前我都講過，呢個世界萬變不離其宗，玩來玩去都係嗰幾味，落 Disco、唱 K、猜枚、 Live Band同掟飛鏢……問題係呢期興啲乜咁解。
其實十年八載之前，香港酒吧界嘅掟鏢熱都不知幾咁澎湃，只係後來俾來勢洶洶嘅 Disco熱擊走，先至搞到逐漸式微之嘛！但我都講過，呢個世界是圓也是玄，因為跳舞牌照越來越難出嘅關係，搞到盛極一時嘅 Disco都開始有回落現象；無咁多 D落，但一樣有咁多人有需要出嚟玩 o架噃，所以聰明嘅香港人就即刻紛紛轉型，大家有無留意近年多咗唔少懷舊 Feel酒廊咩？既然酒廊都 Hit得番起，飛鏢當然大有潛質再 Hit多 Round啦！
講咗長篇大論，聰明嘅大家應該都估到今日貓仙人要介紹嘅，就係一間以掟飛鏢為主打嘅酒吧，而呢間酒吧就係位處於佐敦廟街嘅「 02… PUB」嘞。雖然呢間酒吧嘅裝潢絕唔係 Grand嗰隻，但勝在氣氛夠晒 Warm，全部人都好似街坊咁好有親切感，所以呢度成日有唔少打單泡嘅人嚟打躉，但就一樣玩得咁熱鬧。
大家可能又會問，成間酒吧都淨係男人咪既齋又 Dry？ No啦！其實呢個場都不知幾多女鏢迷鍾意 Hea，佢哋普遍嘅掟鏢技術都唔弱，仲話隨時歡迎比試咁話。嗱，呢啲咪係交朋結友嘅大好機會囉，成晚流流長，大把時間邊掟鏢邊培養感情啦！
睇波賭馬夠方便
除咗掟鏢之外，呢度仲安裝咗唔少電視，而呢啲電視機最大嘅用途當然唔係用嚟睇劇啦，而係播賽馬同埋足球，因為呢間酒吧行過兩條街唔使就係投注站，絕對方便同舒服過踎喺投注站門口先啦！不過貓仙人都要奉勸大家一句，小賭怡情，留番啲精神同彈藥識吓女好過啦！
酒水方面，一般佐敦酒吧價，呢度唔係 Sell拳手，所以酒水價錢絕對化算，平均一 Set啤酒百幾銀就有交易，呢個價錢無話可說啩？
■除咗飛鏢，仲有最新日本運港嘅遊戲機玩。
■呢度兼售唔少飛鏢配件，難怪吸引咁多武林高手 Hea啦！
■與其話呢度係一間酒吧……倒不如話呢度係飛鏢樂園。
■呢度嘅掟鏢配套真係非常專業。
（地址：佐敦廟街 262號地下）
