心目中巨星之四：唐山大兄永垂不朽 鳳凰吧

近日收到風，話嚟緊尖沙嘴又有幾間酒吧會收檔，聽到個心不禁一沉，雖然啲酒吧唔係我嘅，但如果係因為個市唔好做唔住，咁我都有啲擔心一眾酒吧界嘅老友記，唔係啦，即刻去索多啲料先。去到「鳳凰吧」，好彩經理 Edmond話：「有你幫手介紹，我哋有排旺，邊得閒嚟執！」咁又係，睇佢閒日生意都唔錯，咁我就放心啦！話晒呢間係我主場，無咗點得呢？我最 Buy呢度嘅娛樂設備足夠，鏢機新款舊款有齊，又有最新嘅卡拉 OK，足球直播梗係唔少得啦，電視仲特別多，就算一個人嚟，坐吧頭睇波都唔會悶。


酒水價錢大路，歡樂時光$128一 Set啤酒，正價就$198；大酒$1,700三支。特別之處係，每日凌晨 2時後，有「貓頭鷹時間」，啤酒一 Set$128，抵唔抵飲？同一條街好難搵到第二間囉。


■最新嘅 Online鏢機一樣有得掟。


報完酒水，又係時候同靚女熟客 Ceci嗲兩句，佢話：「巨星？梗係李小龍啦！特別對香港嚟講，都無乜邊個有佢咁嘅級數！」我絕對同意，試問有邊一個星拍 4部半戲就可以永垂不朽？既然同 Ceci咁啱 Key，唔使講多，大家「亨」番杯做個朋友仔先！



■呢度最出名就係泰式小食，唔餓都要試。




■老友聚舊一定開心。




■悶悶哋一個人坐吧頭飲酒都唔錯。




■酒吧有高枱又有梳化俾客人選擇。


（地址：尖沙嘴寶勒巷 17-19號地庫）