飲餐飽之七：兩隻話事啤 Obarla

最近發現咗個新遊戲，玩法簡單，但飲酒速度比普通枚快一倍有多。遊戲適合 3人或以上，玩法係派一隻啤牌喺枱面，如紅心 10，之後每位玩家各一隻，配合紅心 10為一組，最細牌嗰家就罰飲酒半杯。當然，唔係派完即開牌，首先定下一杯酒有 10格份量，之後，順次序問玩家是否換牌，可以換到啱心水為止，而換牌當然有條件，每換自己手上牌就飲兩格酒，換其他人手上嘅就 3格酒，換枱面上嘅就 5格酒，每有人換牌，就要以換牌人重新再問一次，直到完全無人換牌為止。


■酒吧唔逼狹，絕無上樓吧嘅死穴。


至於大細，則以同花順如紅心 10加紅心 9或 J最大；其次係一對，之後係「蛇」，跟住係「花」，最尾點數鬥大。遊戲刺激之處在於醜牌可以講大話，但輸嘅機會大，於是人人都選擇換牌飲酒，銷酒快，有心呃酒飲必玩。
至於落邊間酒吧玩，呢間上樓吧「 Obarla」唔錯 o架，鏢機、卡拉 OK樣樣齊，全場大梳化，人多亦有 VIP房，加上酒吧掟鏢氣氛唔錯，周不時見到型男索女鬥吓鏢，上得嚟一定手痕掟番局。歡樂時光$120一 Set啤酒，正價就$198；大酒$750，買二送一。任飲，平日男$200、女$150；周末就男$250、女$180，撐得過。









■鏢機周不時都有人玩，可見酒吧有一股掟鏢氣氛。




■（上）同花順（右）一對（左）蛇（下）花


（地址：尖沙嘴亞士厘道 27號 8樓）