上星期難得地可以一大班朋友敍舊，唔使講梗係要搵間又大又多嘢玩嘅酒吧啦，諗一諗，終於揀咗「 Rich Bar」，環境夠晒大，除咗大廳梳化枱之外，仲有大把 VIP房。玩嘅嘢又夠多， VIP房內有卡拉 OK，大廳又有鏢機，最重要係，呢度勁有 Party Feel，大吧頭前有個超闊舞池，加埋五光十色 Laser射燈同埋駐場 DJ打碟，音樂夠響夠勁，就算平時唔多跳舞，對腳都忍唔住跟住音樂節奏郁幾下。
酒水方面，星期一至五男士$220、女士$150；星期六及假期前夕，男士$300、女士$200。另外，晚 11點前首 100女士入場收費減$50，早到有着數啦！
好似阿晴同 Elise兩位靚女咁，只要好玩嘅地方，佢哋一定有早無遲 o架。問到 Elise有乜圍枚好介紹？「今期梗係玩獎門人嘅『我勁啲』啦，仲要一班人玩，輪住嗌，一齊出手，最啱啲飲到貓貓哋，聽唔到人講嘢嘅人玩，等佢飲多兩杯開心啲！」
■口渴去吧頭飲杯 Cocktail醒醒神先。
■ DJ駐場打碟夠晒氣氛啦。
■加埋 Laser燈幾好 Feel。
■忌廉 Shooters夠特別。
藍色憂鬱
（地址：尖沙嘴東部加連威老道希爾頓中心 1樓）
