呢間酒吧周不時都會搞唔同 Event，又係靚女奉旨 Show身材嘅時候。
上個月某一日，突然收到酒吧經理阿 Co嘅急 Call：「江湖救急，有無辦法幫我搵兩張林峯演唱會飛？幾多銀都無問題。」難得靚女主動來電，在下當然義不容辭，並隨即打去畀金牌大風相熟嘅 Cat姐撲飛：「 Cathy，江湖救急，……」重複靚女嘅說話一遍， Cat姐聽完，好尷尬咁答：「但係林峯唔係我哋公司喎！」噢……樣衰出汗呀。撲唔到飛，即係無藉口向靚女獻殷勤……
落足眼力吖，身材唔錯 o架！
點算好呢？好在呢個世界往往就係咁估佢唔到，翌日 Cat姐竟然打電話嚟問：「你係咪要林峯演唱會飛？咁啱同事有兩張正位放出嚟喎！」 Yeah！都話儍人有儍福，二話不說即刻向靚女報喜，佢當然開心到飛起，仲應承即晚請我去佢做嗰間「 Nirvan」飲酒㖭，即係奉旨有靚女陪，都話做人嘅嘢好心有好報啦！
之但係，靚女就一定受歡迎，所以，我去到嗰陣，佢只係得閒同我講咗聲 Hi啫，就成晚喺個場氹氹轉，硬係無時間陪我一邊 Drink一邊傾，搞到我鬼咁無癮。好在呢個場無嘢多，客人多，拳手又多，而且個個都係標準醉街拳手，想挑戰骰盅拳腳都無任歡迎，如是者識吓新朋友，都好容易打發一晚嘅時間，都話歡樂嘅時光過得特別快 o架啦。
一睇就知呢度嘅拳手唔容易應付。
呢個場嘅質素都算非常 OK
早蒲慳酒錢
呢間酒吧無論人氣同拳手都夠晒爆，但玩還玩，點都要顧及荷包問題，好在呢個場嘅價錢都非常 Standard，尖沙嘴嚟講算係一般過一般， Happy Hour每 Set啤酒$98，圍起條數每支都係十幾蚊；如果唔想天未黑齊就飲到醉眼昏花， Normal Hour每 Set加多一嚿水，即係$198；驚飲得多啤酒翌日會水腫唔靚仔的話， Chivas每支$678全包宴，一次過 Order三支就優惠價$1,800，平均六嚿水一支。
照咁講，好明顯係越早蒲越着數，淨係啤酒都差成倍價錢，又唔怕夜蒲無位坐，下次我會約齊班 Brother天未黑就出發， Go、 Go、 Go！
無老點，呢度真係旺到插針都插唔入。
地址：尖沙嘴金馬倫道 5號太興廣場 4樓
