一大班朋友去飲酒，全男班就梗係易話為，環境點樣都唔係好重要，最緊要有杯酒就得；不過，如果夾雜不少女性朋友，咁選擇場地就梗係要揀啲斯文同又夠舒服嘅酒吧。撞着咁嘅情形，我通常會推介上樓吧，特別係嘉芙中心，因為嗰度啲場的確比其他上樓吧大啲，特別係「 Moola+」，更加感覺舒服到不得了，而且有最新 K歌唱，又有 Online鏢機。
至於酒水方面， Happy hour啤酒$14支， Normal就$38支；大酒$780，三支$1,780。任飲方面，星期一至四男士$250、女$100；星期五男士$300、女士$100；星期六男士$300、女士$200；星期日男士$200、女士$100，睇埋價錢，女士飲嘢又真係勁抵。
不過，有男有女嘅約會，無理由男有男猜枚，女有女唱 K咁悶吖，至好就係玩吓圍枚，搞吓氣氛，咁有乜玩法好介紹呢？問吓靚女侍應 Carmen，「人多梗係玩動作題啦，好玩又唔舊，可以玩芭蕉樹加蒙羅麗沙，玩法係隨意指第一個，指佢係芭蕉樹時，自己就扮一棵直嘅樹，而左右就扮左傾斜同右傾斜嘅樹，做到就繼續嗌；如果玩蒙羅麗沙，就自己擺個靚甫士，而左右就幫佢用手扮畫框。雖然低能啲，不過就勁好笑，玩完之後，友誼應該增進不少呀！」
■ Tequila Sunrise$68
■特大吧頭，點完歌 Order杯 Cocktail最啱。
■酒吧環境又大又舒服，最啱講求環境嘅人士。
■最新 Online鏢機一樣有。
