廿八蚊夠啲乜之七：回報要合理 M&M

上星期係「 M&M 」周年慶祝，呢間吧我真係睇住佢開，睇住佢旺，見到佢哋慶祝，我都幾開心吓。當晚人頭湧湧唔在講，氣氛超 High，事關酒吧請咗隊 Live Band嚟大唱特唱，唔少仲係令人熱血沸騰嘅 Beyond舊歌。喺呢個咁亂嘅環境，要搵靚女影相真係有啲難度，最簡單嘅方法就係去吧頭等──等靚女 Promoter Kelly埋嚟攞酒時㩒兩張。

正想再問佢兩句時，「唔好問住，轉頭先！」又飛身去送酒。就係咁，答條問題都幾花時間吓，「廿八蚊一個鐘又無話唔合理嘅，咁工作性質要求唔同，不過，好似我哋企成晚又要搬酒嘅話，又真係唔係好合理，好在我哋做幾多，都有個成正比嘅回報。廿八蚊係最低時薪，我都支持嘅，太高盞啲老闆諗縮數出蠱惑！」
同完 Kelly吹水，唔覺唔覺又 12點，台上突然仲多咗隻大燒豬，生日就梗係與眾同樂，人人有燒肉食先開心。食燒肉前當然要報吓酒水先啦，歡樂時光$126一 Set啤酒，正價時段就$198；大酒$730，買三送一。
酒吧逢星期一至六晚上 10:00至凌晨 1:00，更有駐場琴師為大家獻技，帶動全場氣氛之餘，仲可以上台唱吓 K，鍾意聽歌又好、唱歌又好，都啱晒 Channel！