■呢位靚女坐正喺我隔籬，我當然要把握機會同佢私片番幾鋪大話骰啦！
■佢話最叻係講大話，唔怕你嚟挑戰大話骰！
其實，出嚟飲酒又唔一定要劑劑新鮮次次精采，幾條麻甩男摸住酒杯底風花雪月一番，都一樣咁開心，問題係要揀啱場合囉！終於光頭仔帶咗我哋成班友去銅鑼灣一間上樓吧「 Pub Paradise」。呢個場畀我第一感覺係：地方夠晒大，樓底又夠高，感覺上唔會有一般上樓酒吧嘅侷促感；而且有得上台唱 K， Main point係音響唔差，兼且 K歌選擇亦算多，所以對呢個場嘅第一印象絕對唔錯。
除此之外，我仲留意到一樣嘢，就係呢度啲客人嘅歌喉普遍都見得吓人。嘩！人家個個都唱得咁好聽，搞到我都唔好意思上台唱，免得搞到成個台都係雞蛋同番茄啦！唔唱 K，好在呢度仲有一個超級無敵掟鏢 Zone，就算成班人圍埋，同一時間一齊掟鏢，地方都好鬆動，難怪吸引咁多鏢迷長期打躉啦！
■好快成間吧都係貓貓，啲啤酒賣得平嘛！
■一睇佢個樣就知佢嘅酒量唔係人咁品。
大酒全包任溝
講真，我絕對唔係有異性無人性之人，出嚟蒲咗三五七載，有乜靚女未見過先？但成班麻甩男圍埋飲酒，頭嗰一粒鐘都無乜問題，但兩杯到肚自不然有啲身體接觸，感覺上好似有啲斷背 Feel，所以乜嘢環境下都好，梗係嗱嗱聲搵番一、兩個拳手埋嚟點綴吓先啦！呢個場啲拳手，優點係玩得又親切，越猜就越開心；出嚟玩嘅最終目的都係尋開心，又唔係做人世，玩得開心就最緊要！
酒水價錢方面，雖然呢間樓上酒吧位處於租金貴到嘭嘭聲嘅銅鑼灣，但係每 Set啤酒都係$128就有交易喎；除咗啤酒賣得平，就連威士忌嘅價錢一樣咁有驚喜，不論 Black Label定係芝華士，每支盛惠 600大洋，老規矩，全包宴，唔理你鍾意溝梳打、綠茶定薑水，都係唔需要另加錢。
我就覺得呢個價錢相當抵玩嘞，飲到七成醉都係兩嚿水左右，絕對符合經濟原則，咁就真係飲得開心又放心囉！
■咁大個掟鏢區，邊吹水邊掟鏢，人生一大樂事也。
■唔係講笑，銅鑼灣上樓吧嚟講，呢間都算地方闊落。
地址：銅鑼灣謝斐道 496號金利文廣場 5樓
