多數人去親九龍區飲酒都離不開油尖旺，其實，成個九龍又點止三區咁少呢？大家只要有留意，九龍有不少地方都有好嘅酒吧，以土瓜灣區為例，銀漢街嘅「 Bar East」就係一個好例子，呢間吧喺呢區出名好氣氛，環境舒服唔在講，酒吧最夠響夠獎就係多飛鏢高手，睇見吧頭一個個大盃獎就知啦！除飛鏢外，亦有靚女拳手同大家猜兩板，坦白講想醉番晚嚟呢度啱晒，加上平靚正酒水，好過出尖嘴俾人屈，呢度歡樂時光$123，正價就$183，買三 Set送一 Set；大酒最抵$598一支，我建議入嚟飲大酒，慢慢嘆住嚟掟鏢又得，大開大合劈餐飽又得！
當然，要劈酒梗要搵埋好枚又好品嘅細詩啦，估唔到細詩好枚之餘，對足球都有啲睇法，「最好睇就梗係國米對拜仁啦，最初我都估係悶波一場，但估唔到國米真係搏命攻，最可惜都係輸一粒。不過，我睇佢下回合一定攻得更加狂，下場可以話係歐聯必睇賽事之一。」細詩嘅睇法同我一樣，我保守估計起碼有 3個入波，呢場咁精采嘅比賽，就等次回合落酒吧同大家一齊睇啦！
■酒吧設有鏢機供大家飲酒之餘娛樂吓。
■雖然唔係旺區，但氣氛非常好！
■吧頭唔算大，一個人嚟至啱坐 o架。
■咁多獎盃，可知呢度高手雲集啦！
（地址：土瓜灣銀漢街 17號地下）
