酒吧新貴之二： 12年仲醇啲 i Darts FC

最近朋友帶我去灣仔一帶蒲，原來呢邊都有唔少好好玩嘅酒吧。我朋友係飛鏢發燒友，佢帶我去咗呢間「 i Darts FC」，一睇個名就知係飛鏢場，果然，吧內有排長長嘅飛鏢機，部部都企滿人喺度玩，仲係最新款嘅 Online鏢機。此外，又有多間 VIP房，其中最大一間真係好吸引，分分鐘大過人哋成間上樓吧，設備勁正，超大電視一定有啦，連美式波枱都成張擺得落，一班朋友飲酒唱 K之餘，仲有多種活動玩，確係唔錯。

酒水方面， Happy Hour一 Set啤酒$138， Normal就$198；大酒$700一支，三支$1,800。任飲價，星期一至日男$350、女$300。
介紹完酒吧，飲番杯解吓渴先，突然聽到把靚女聲：「試唔試吓我哋隻新酒？」抬頭一望，原來係靚女 Promoter阿 Boot，見手中嗰支係馬諦氏蘇格蘭威士忌，即時認吓叻：「我知，呢支係 Matisse Old吖嘛。」點知就係咁咗，阿 Boot解釋：「係就係 Matisse，不過呢支係『 12年』，唔係『 Old』，醇好多 o架！」有乜分別先？「呢隻酒用 7種純麥釀成， 7種麥味相輔相成，飲完一啖，你會覺得香甜味得嚟，喉嚨會有清新麥香同豐富煙熏味 o架！」咁複雜？見你講得咁仔細，即管試試啦！


■呢支「 12年」值$1,200，不過，以威士忌嚟講就唔算貴。



■今期贈品有火機或雨傘。




■酒吧以鏢機客為主，所以嚟掟鏢特別好氣氛。




■ VIP房大到放張波枱都得。




■認住紅色鏢徽 Logo好易搵。


（地址：灣仔灣仔道 230號佳誠大廈 1/F）