早幾日聽林海峰節目話酒吧出現咗隻新威士忌，仲要係明星古天樂做代言人，講到咁巴閉，無理由我呢種行酒吧多過行街市嘅人唔知 o架！即出去八吓乜料，好彩上到「 S Club」終於俾我搵到，而且仲有靚女 Promoter Chara。「唔係吖，呢隻酒咪叫馬諦氏蘇格蘭威士忌囉，我手上呢隻 Matisse Old，最適合啱啱開始學飲威士忌嘅人飲。」有乜特別先？「我哋隻酒絕對唔建議你溝乜溝物，淨飲就最正。」淨飲？會唔會辣得滯呀？「飲過你就知！」 Chara咁落力，即管試一啖。咦，又的確唔辣喉，仲幾醇㖭，不過最衰 Chara唔可以同我一齊飲吖，有醇酒無美人。
■紫色梳化，搶眼得嚟仲好舒服。
講完酒，梗係介紹埋間吧，佢哋啱啱新裝修完成，感覺唔同晒，換晒新梳化，勁有格調。酒水方面 Happy hour啤酒$138， Normal就$198；大酒平日$680， Weekend就$720。另外，可以做任飲，平日男士$200、女士$150； Weekend男$250、女$200，一啲都唔貴，最緊要個場夠 Mood，飲酒吹水零舍投入呀！
■人就梗係貪新忘舊，睇個酒櫃就知今期興飲乜啦！
■落吧唱 K，都有好多新歌你揀。
■啱啱新裝修完成，招牌都靚仔晒。
（地址：尖沙嘴山林道 21號永勝商業中心 5樓）
