醉駕罰乜好之六：罰企交通黑點無名島 II

今晚英超又有多場大戰，落酒吧連睇三場有時都幾甘吓，唔止捱眼瞓，一個唔覺意成班老友話去尖嘴啲貴價酒水酒吧飲住睇，你都咪話唔肉赤，所以唔好講笑，星期一至五歡樂時光你話事無所謂，但要睇波我一定落太子酒吧街一帶，無他，一個字──平，好似「無名島 II」呢間， Happy Hour$138一 Set，買一送一， Normal就$138，大酒$638，小食$18一碟，識計數就知比出面平，飲成晚真係慳唔少 o架，留番搭的返屋企都好吖。

■上層地方夠大，人多嚟玩都開心啲。

酒吧又分上下兩層，靜靜地睇波吹水下層啱晒，想唱歌掟鏢上層設施齊備又夠大，成班人猜圍枚夠晒熱鬧。而且，仲有拳手同你猜兩板，絕無冷場，靚女 Akie大家一定要識吓，佢為人 Nice，飲酒又均真，問佢點罰醉駕好，佢話：「罰企咪算囉！」咁順攤？「咁當然特別啲啦，係罰企交通意外黑點，等佢感受馬路如虎口，揸車一定要小心！」係就係，但萬一發生意外咁點算？對其他駕駛人士都唔係咁好噃。不如判罰做社會服務，一家便宜兩家着。