「如果真係講享受，我就推薦你飲呢隻馬諦氏 19年蘇格蘭威士忌。聽見 19年就知好嘢啦，而且佢仲係 Single Malt，即係單一酒廠出，用嘅係單一麥類，其他威士忌有啲除咗用小麥釀外，仲會有其他穀類，但呢隻就只用小麥釀製，醇度同麥味都係咁正，入口一啲都唔辣喉，去到喉嚨有濃郁嘅麥香同煙熏味，當然飲呢隻酒一定要淨飲，唔好亂溝嘢啦！」
收到！不過飲靚酒就一定有好環境，落啲劈場擺支「 19年」出嚟，啲人識鬼欣賞咩！但係嚟到呢度又唔同，呢間上樓吧一入到去就覺得好有格調，地方唔算大，但全場紅色皮梳化夠型，而且又多上牆大電視，唱Ｋ感覺一流。想私人啲，亦有 VIP房供應。
■「 19年」賣二千幾蚊，其實比起其他同年份嘅酒平一大截。
酒水方面， Happy hour就$12支啤酒， Normal hour就$200一 Set。 Matisse Old係$680， 12年馬諦氏蘇格蘭威士忌$1,080， 15年就$1,680、 19年$2,380，想飲有質素嘅酒，點都要付出少少嘅。
■吧頭旁有鏢機，最啱邊飲邊掟。
■全場紅梳化，好搶眼。
（地址：銅鑼灣耀華街 3號百樂中心 22樓）
