文、攝：貓仙人
呢個世界果然係早起的鳥兒有蟲吃，我大安旨意踏正十點先蒲頭，卒之連門口都逼唔入，咁點算先？着到型爆咁諗住參加 Party，無理由原車折返 o架？好在，老蘭出名靚女多酒吧更多，喺老蘭斜路發現呢間「 YAMANE SALLON」個 Feel都 OK唔錯喎，唔錯在幾乎全開放式，可以提供多一個節目畀我──街女。
無錯，呢間吧最大優點係設計夠 Open，客路多數係三五知己想剝住花生飲番杯冰凍啤酒嗰隻，好鬼優皮 Mood，十足十城市中嘅偷閒加油站，而且，全開放式門面設計，可以讓客人睇清楚場外嘅環境，有乜靚女行過都睇得一清二楚，實在為人着想。
■飲酒之餘仲可以欣賞埋蘭桂坊絡繹不絕嘅靚女， Very Nice。
■呢度好多靚女打躉，係咪即時精神晒呢？
■邊個話靚女都鍾意蒲 Disco？大把人鍾意嚟呢度傾心事。
■坐得近街就有呢個着數，可以睇埋街頭騷。
街騷免費睇
■呢度地方唔大，睇波氣氛一流。
呢間酒吧除咗感覺夠 Free之外，仲有乜好玩？玩氣氛囉。其實，呢間酒吧係蘭桂坊數一數二睇足球賽事好氣氛嘅酒吧，幾乎乜嘢足球賽事都有得睇，實行你喜歡睇邊場佢就播邊場， Nice到你唔信喎！
而且，由於座位幾乎挨住條街，所以，有乜靚女行過、街頭表演都絕對唔會錯過，飲酒睇免費騷，無得彈啦！嗰晚我就見到傳聞中嘅老蘭 Superman跳街舞，真係好 Funny。
呢度大部份客人都鍾意吹住水咁剝花生嘆啤酒，所以啤酒選擇特別多，好似 Hoegaarden Draught呢類較冷門嘅酒都可以搵得到，大大杯都係$70。普通一杯 Vodka Lime就$56有交易，話晒中環算係咁啦！如果嫌啤酒利尿傷肝的話，飲 Cocktail啦，呢度個靚仔經理 Tony先生之前喺怡東酒店嘅 Lounge任職多年，你講得出嘅 Cocktail，相信佢都曉得調畀你飲，絕大部份價錢都係$70一杯左右，大酒店水準喎，抵撐啦！
地址：中環蘭桂坊 13號地下
