昨日睇完本欄講威士忌嘅正確飲法，大家有無去試吓呢？飲唔飲到啲麥味呀？其實，除咗飲法，威士忌年份亦好重要，但係香港酒吧唔係間間都會有年份高嘅威士忌，一來價錢貴，二來反正啲客都鍾意溝淡嚟飲，使乜用好嘢先？嗱，想飲好嘢，就跟我走轉啦！呢間「 La lavande」場夠旺之外，難得在酒種唔少，呢期推介係馬諦氏，靚女 Promoter Milky話：「我手上呢支馬諦氏 15年蘇格蘭威士忌，好特別 o架，出名酒味醇，話晒係 15年佳釀，難得有機會飲到，點都要試吓嘅。」咁又係，一生無幾多個 15年。「嗱，入口先有啲橙橘味，再而有檸檬清香，之後又有啲茉莉嘅清香，最後落到喉嚨就係香甜嘅麥味同煙熏味散發出嚟，好有層次 o架。飲威士忌唔係就咁吞落肚咁簡單，要識飲至品嘗到真正嘅味道。」 Milky講得頭頭是道成個專家咁款，我一時間都無聲出，惟有叫佢開支嚟慢慢教我點飲。
■睇吓咁多人留酒，就知馬諦氏係呢期潮酒之一啦！
有靚女教飲酒，又點可以孤寒？何況，呢度酒錢都唔貴，普通嘅 Matisse Old係$1,200， 15年就$1,700。其實一班人飲，隨時抵過飲啤酒。不過，若然你係死硬派啤酒怪，呢度一樣有， Happy Hour一 Set$118， Normal就$198，星期二 Ladies' Night，只收男士每位$320，其他日子任飲，平日男士$320、女士$220。酒水唔算最平，但一定飲得高興又好 Feel。
■呢度吧頭出名係全尖沙嘴最靚。
■掟鏢之餘仲有最新飛鏢資訊俾你睇。
■呢支 15年，價值$1,700，梗係好嘢啦！
■ Online鏢機呢度一樣有。
（地址：尖沙嘴金馬倫道中國保險大廈 3樓）
