意甲鬥一番之三：靚仔大晒西藏

早幾日諗住行吓尖沙嘴啲酒吧，點知發現唔少已經關門大吉，諗起啲老友記，家唔知點，都確係望門興嘆，有啲難過。不過，我總信一樣嘢，就係舊嘅唔去新嘅唔嚟，好嘅酒吧一定會越開越多嘅，好似「西藏」咁，一開就廿幾年，當然係好先多人幫襯啦！

呢間吧，酒水抵飲係其中一個受歡迎原因， Happy Hour啤酒$20支， Normal就$32支，大酒$680。另外，仲有多款 Cocktail，都係$33起，靚女特別 Buy啦！其中靚女熟客 Queeine正係呢度 Fans，「我最鍾意呢度啲 Cocktail，水準一定拍得住大酒店。」我亦信佢講，事關我都試過。講番波經，唔知靚女對意甲有乜睇法呢？「講波咋，又點會難倒我呀！仲要係最多靚仔嘅意甲，我梗係支持羅馬啦，話晒有靚仔王子托迪，我今年點都撐梗佢。」唉！睇樣定勝負，典型靚女睇波法，信唔過！