日本網絡鏢機　全港只此一家 iDarts Club

喺香港鍾意掟鏢嘅人唔少，所以亦都衍生唔少以飛鏢做主題嘅酒吧，今日要介紹嘅就係 Hit爆尖沙嘴嘅「 iDarts Club」，事關呢間酒吧破天荒設置咗十部日本超人氣網絡連線飛鏢機，除咗係全香港只此一家，仲係日本以外，全球首間設有網絡飛鏢機 DARTSLIVE2嘅店舖，就算唔鍾意掟鏢都要去見識吓啦，吓話？

呢間酒吧面積有成四千五百平方呎，如果唔係點裝得入十部 DARTSLIVE2網絡連線飛鏢機？除咗飛鏢區之外，呢個場仲學足日本咁設有 Lady Zone，作用係乜？我諗係集中晒全場嘅靚女，等我哋識女仔都易啲啩？其實呢，呢個專區係可以俾客人包嚟開 Party嘅，有埋私家飛鏢機，可以容納 15至 20人，包場起錶價$2,500，人齊夾番，隨時平過喺大廳逐 Set酒嗌 o架。
講番呢度啲飛鏢機，係就係好先進，但對於唔識掟鏢嘅人嚟講，一切都係徒然噃。有見及此，所以酒吧就附設埋飛鏢教練，教授大家飛鏢技巧，真係細心到你唔信呀！

■兩位「 chill模」個樣係咪好鬼 Sweet呢？

■日本超人氣嘅網絡連線飛鏢機，全港只此一家。

■全新日本遊戲機，又係全港只此一家。

■呢度勝在地方夠晒大，完全唔侷促。

■ Lady Zone開派對，$2,500有交易。

特別 Party熱鬧好玩
此外，呢個場仲提供埋最新嘅日本網上遊戲機，如果嫌返工已經成日對住個「芒」，出到街唔想再咁「宅」的話，當然亦有其他選擇啦，例如逢星期五、六晚都會搞好多唔同主題嘅 Event，剛過去嘅星期五，呢度就搞咗個「東洋人氣 chill模激選」，其中五位激模仲係專誠由日本飛嚟參加呢個 Party，七位候選模特兒同現場朋友玩遊戲，氣氛熱鬧又好玩。
雖然呢間酒吧玩日本 Feel，但價錢就唔會好似日圓咁持續高企。啤酒大致上都係$198一 Set，比較特別嘅係呢度只賣一種威士忌 Matisse，價錢就$820一支，唔係飲慣嗰隻咁點算？咁咪唔好飲威士忌飲其他酒囉！呢度仲有唔少日式 Cocktail提供。