意甲鬥一番之五： A米勁在四條煙 Cave Pub

今日推介「 Cave Pub」，劈場一間，入得門口就預咗劈到嘔，拳手唔肯上鏡，但件件都猜得劈得又飲得，十五二十、骰盅呢啲大路嘢固然玩到出神入化，連一般女仔唔多曉玩嘅鬥地主，佢哋都玩得唔錯，「火箭升空！」「飛機帶對翼！」唔會亂爭住做莊，輸咗又唔會賴皮唔飲酒，呢啲咪叫服務態度囉。裝修方面，無話超級靚豪裝，但坐得舒服地方乾淨，坐大吧頭方便女，手痕可以掟鏢，口痕可以搶咪唱大堂 K，總之擺低一百幾十，保證你可以笑住走啦！
入番主題，問 Promotor Moon睇好邊隊攞意甲冠軍，佢話：「我唔係好識波 o架咋，不過我希望 A米威番一年啦，聽人講家 A米有四條煙，好似好勁咁。」邊四條煙咁勁呀？考吓佢先，佢諗咗一陣話：「好似係柏圖、羅賓奴、 C朗同埋個伊乜鬼……」都中一半 OK啦， Moon答中柏圖同羅賓奴，不過朗拿甸奴就講錯成 C朗，「伊乜鬼」其實係伊巴謙莫域。同佢吹完水，又要搵老闆傾兩句，酒水點計先？佢一句彈埋嚟：「總之就抵飲啦。」望吓水牌，歡樂光每桶啤酒$108，正價$168，大酒每支$680，老實，唔算特別平喎，「我最鍾意猜枚 o架嘞，你同我玩得 Friend的話，我請你飲又點話！」原來有簽酒，咁又唔同，大家收到啦，得閒就落去挑戰佢喇。