意甲鬥一番之六：史奈達踢到識飛 Grand Pub

呢排巡場，發覺啲 Promoter好鬼省鏡，唔講邊個就講駐場「 Grand Pub」嘅小魚，笑容甜到漏，水汪汪一雙黑眼睛，真係電到你頭暈，「靚仔，幫襯吓吖。」嘩，人靚聲嗲仲要叫我靚仔，真係唔幫襯你都唔得啦！凡事都有等價交換，我幫襯佢，佢都肯幫我影番幅相，擺完 Pose閃完閃光燈，佢開始分析意甲形勢，我用到「分析」兩個字，可想而知小魚真係有啲料到：「今年都係國米攞冠軍 o架嘞，一個史奈達踢晒啦！」連中場史奈達都識，勁喎，「雖然摩連奴走咗，換咗以前教利物浦嗰個賓……唔知乜，但國米實在超晒班，贏歐聯應該無佢份，但一定橫掃意甲囉。」無錯，我都好憎賓尼迪斯，但國米確係班底好，人強馬壯，意甲應該手到拿來。





■都係 Online鏢機，不過呢部新啲，叫鳳凰機。


講番間場，名副其實，裝修確係好 Grand，所有基本配套都新簇簇，絕無話殘殘舊舊，我尤其欣賞啲大梳化，可能我嗰晚攰啦，一攤落去就同梳化融為一體，舒服到唔想起身。氣氛方面，兩個字講晒──熱鬧！加上又有最新嘅 Online鏢機「鳳凰鏢機」，想玩得 in就梗係要學啦！講咗咁耐係時候報酒水價錢， Happy Hour每支啤酒兩條草，貴唔過七仔幾多，正價每支$28，即係每桶$148，直頭抵到爛，大酒每酒$650， Order三支$1,680，差唔多慳成三嚿水，飲唔晒咪留酒，下次再飲過囉。



■睇吓酒櫃勁多不同味道嘅酒，就知呢度嘅 Cocktail有水準啦！




■全場梳化夠舒服。


（地址：太子西洋菜北街 221-225號美邦大廈地下 C舖）