解酒妙法之三：熱奶暖埋胃 Aqua

上星期六諗住同朋友去亞士厘道飲嘢，行到雅士利中心，條人龍排到出晒街，睇見都怕怕，等分分鐘要成半粒鐘，仲要睇住啲人打尖（有朋友喺前面，就遲嚟先上），條氣梗係頂住頂住啦，朋友嬲嬲哋唔等，唔信得佢呢幢大廈有酒飲，我就推介佢哋過隔籬嘅亞士厘道 27號「 Aqua」，講真環境一啲唔差，又有靚女拳手猜枚，一班朋友都話我無介紹錯，玩得 Happy之餘個個都醉到啤啤夫，我就梗係未醉先投降扮飲唔到啦！你知啦，飲醉咗第二朝再嘔過好辛苦 o架。
講到呢度就梗係打蛇隨棍上，問吓身邊靚女婷婷有乜高見啦！婷婷：「睇吓之前飲乜醉啦，如果飲啤酒我就飲番支寶礦力水特，如果飲威士忌就飲杯牛奶，因為，威士忌酒精勁削胃，所以飲牛奶會好啲，最好係熱嘅，暖埋胃。」呢個方法我都聽過，我都信係 Work嘅。不過，唔好醉最好啦，就算酒水好似呢度咁平── Happy Hour一 Set啤酒$128， Normal就$188；大酒$680，三支$1,800。任飲平日男士$250、女士$200； Weekend男士$280、女士$220──都要保重身子，咁先長玩長有 o架嘛。