大時大節，就梗係要去大場玩至好氣氛啦！呢期數山林道最旺嘅酒吧就一定非「 Club Nana」莫屬，地方可算是附近上樓吧最大的一間，而且有專用電梯夠晒尊貴。環境方面，除有 VIP房外，仲有多張梳化枱，全場容納百零人都無問題。設備方面，酒吧中間有三部大電視，成三角形排列，亦有多部上牆大電視，無論唱 K或睇波，就算坐到角落頭都睇得清清楚楚。酒吧左邊亦設有飛鏢區，放有三部鏢機供客人耍樂，設備齊全，難怪係近期旺場之一。酒水方面，歡樂時光$108一 Set啤酒，正價就$198；大酒$680。任飲方面， Weekend男士$300、女士$200；平日就男士$250、女士$180。聖誕期間價錢就未定，大家有時間落嚟玩吓之餘，問啱價錢 Book枱就要快。
■一日一啤酒，醫生走唔走就唔知，不過肚腩就一定接近我！
硬件滿分外，酒吧仲有不少靚女拳手同你猜枚搞吓氣氛，不過一班靚女都怕醜唔肯上鏡，無計之下好在仲有靚女侍應 Suki夠老友夠幫手，問 Suki聖誕有乜好節目，佢話：「我當然想食聖誕大餐啦，所以一早 Book定食 Buffet，不過，食完就無得睇燈飾，因為仲要返工，但好過無得慶祝，惟有叫定啲朋友上嚟撐吓場，咁都算係一班朋友過聖誕呀！」
■上樓吧好少有咁大嘅吧頭， Bartender校 Cocktail一樣掂！
■飛鏢區夠大，掟鏢唔怕失手掟親人。
■頭頂有大電視，唱 K唔會俾人遮住。
（地址：尖沙嘴山林道 7號佐敦漢國中心 2樓）
