聖誕好氣氛之五：太多選擇 Los Angel

聖誕節想搵包場好地方，「 Los Angel」都係一個唔錯嘅選擇，我最鍾意佢燈光夠暗好氣氛，成 2,000呎地方夠晒闊落，足以容納 40-50人，搞 Party氣氛一定好。裝潢陳設以深色為主調，地板鋪上拋光磚，令整體感覺光潔富格調，而牆身則鋪上古典花紋圖案牆磚，喺射燈下份外閃爍。座位方面，全場用上簇新黑色皮製梳化，舒服到飲醉咗當床瞓都得。其中一角裝有偌大玻璃窗，用上金屬裝飾物作垂簾，隱約看見街外繁華鬧市。此外，設有一間可容納 15-20人嘅 VIP房，有獨立卡拉 OK。




■雪人公仔係酒商贈品，手工好精緻。


酒水點計？星期四係女士之夜，女士免費任飲，男士$300任飲。其他日子，歡樂時光啤酒$120一 Set，正價$198，有好客拳手駐場，想猜吓枚都唔愁無對手。大酒一支$780，呢個價位絕對接受到啦！
呢間係唔少靚女嘅 Clubbing場，其中一位熟客阿 Ling就係忠實支持者，問佢聖誕去邊度玩，佢話：「仲未決定，想一班姊姊 Clubbing吓，又想搞吓 BBQ，但又考慮到同男朋友二人世界喎，選擇咁多，都係睇吓到時有無人約先算啦！」你咁靚女，點會無人約呀？講笑咩！


■酒吧有唔少大電視，唱 K或睇波都一流。



■電腦點歌，揀歌自己嚟啦！


（地址：尖沙嘴寶勒巷 10號 5樓）