搞 Party聽落好似幾好玩咁，即時嗱嗱臨攞紙筆抄吓佢牌先，到時一於八吓 Carol蒲邊都好。不過其實唔使問都知佢蒲呢度嘅機會最大，一來呢間場環境的確幾得吓；二來有成 2,000呎，夠晒大，足以一次過容納 80人開派對，以上樓吧嚟講，咁嘅規模唔多見。四周以深色為主調，格局長方形設計，黑色皮梳化坐得夠舒服，除了有最新 K歌唱外，每逢星期四、五、六，更會邀請客席嘉賓駐場打碟，務求將 Clubbing氣氛推至最高點！
酒水方面，星期四設定為女士之夜，女士免費任飲，男士$300。歡樂時光時段，啤酒$120一 Set，正價$198；大酒就$780一支。有好客拳手駐場跟大家猜枚助興，絕無冷場。唔想煩，就梗係 Join任飲，星期一至日男$300、女$150，星期四除外。價錢大路價，但勝在靚女多吖嘛，值得撐啦！
■酒吧設有打碟器材，設備齊全。
■全場多部大電視，環境仲勁有唱歌 Mood！
■連張枱都型過人！
（地址：尖沙嘴寶勒巷 10號 4樓）
