■大家話呢位啤酒女郎個樣係咪好清秀呢？
其實，就算唔係屎枚賢主動 Call我，我久不久都會蒲去呢間酒吧，因為呢個場無論裝修間隔都畀我好舒服嘅感覺，而且呢度有個超大嘅掟鏢 Zone，周不時都會吸引唔少鏢迷喺度打躉，氣氛都唔錯。唔鍾意掟鏢的話，亦可以喺大堂唱吓 K，呢度啲 K歌夠新又夠多，而且音響仲出奇地好，置身其中，唱歌都特別好 Mood，嗰晚我都忍唔住大開金口，唱咗幾首飲歌。
之但係，若然閣下 K唔啱唱，鏢唔曉掟，亦唔怕會悶親，因為屎枚賢絕對係一個可以帶畀客人歡樂嘅酒吧老闆。呢條友真係逢猜必輸，都唔知佢係唔係特登咁做，如果唔係又點留得住咁多客？
■呢位聖誕 Look造型嘅拳手，生得細細粒，但好飲得。
■呢度啲拳手夠晒爛玩，而且絕唔會賴酒，抵讚！
又如果，閣下連猜枚飲酒都唔多啱，有一樣嘢包保你啱玩，就係女拳手嘞，我諗應該無乜邊個男人會唔鍾意同啲青春逼人嘅後生女玩啩？呢度班拳手勝在玩得夠真，就算閣下淨係 Order一 Set啤酒，佢哋都一樣同你玩得咁開心，今時今日咁嘅服務態度至係啱數嘛！
星期日平一截
講完環境配套同氣氛，又要講番去最現實嘅問題──價錢。講真，呢間酒吧嘅價錢算係中規中矩，唔算有太大驚喜，叫做公道價咁啦， Happy Hour每 Set啤酒$108，而 Normal就貴番少少，要$198；最驚喜反而係芝華士，每支$600，話晒都係尖嘴區，呢個價真係 OK抵！唔想咁煩要計住酒錢，不如 Join任飲，逢星期一至四男士$250、女士$180就可以飲到你死我活；星期五、六或假期前夕，男士就要$300、女士$200；嫌貴嘅話，不如星期日先幫襯，任飲男士$220、女士$100，真係平一截 o架。
此外，呢度有兩間 VIP房，大房夠 30-35人用，平日最低消費$2,500，公眾假期就$4,500；人少啲嘅可以要間細房，容納到 10-15人，平日最低消費$1,200，公眾假期就$2,500，開小型 Party都 OK啦！
■一個場有咁多啤酒女郎，係咪睇見都開心呢？
■壽星妹 Janet話最鍾意呢度音響好，咁幾時同我合唱番首歌先？
■呢度個掟鏢區夠晒寬敞，難怪吸引咁多鏢迷喺度打躉。
地址：尖沙嘴山林道 7號漢國佐敦中心 2樓全層
