全民開講金球獎之七：美斯對 C朗鳳凰吧

講咗咁多日金球獎，大家意見差唔多，可能美斯人氣又真係多人識啲，不過，如果要佢哋講吓下年邊個攞又會點睇法呢？一於問吓「鳳凰吧」嘅兩位靚女熟客 Wendy同阿 Mon先， Wendy：「我睇波都知巴塞今年又係無敵啦，點睇都係美斯攞多年唔出奇！」阿 Mon：「我就話係 C朗，睇吓 C朗今年入波入到着晒火就知啦，而且皇馬今年都好勁！」 Wendy：「但巴塞今年擊敗過皇馬喎。」 Mon：「仲有場未踢，話唔定今次皇馬贏番呢！」見佢哋拗唔停，我惟有講句公道話，美斯的確係好波， C朗今年係搶鏡，邊個會贏睇吓聯隊邊隊冠軍咪知囉！

同靚女講完波先發覺香港有不少女球迷，講番今日介紹呢間吧，的確係睇波好地方，就算一個人落嚟都唔會悶，坐喺吧頭同 Bartender吹水又得，睇電視又得， MV、劇集、電影、足球一齊播，任你揀，再唔係又有最新 Online鏢機，嚟個一人連線比賽又得。酒水方面，歡樂時光一 Set啤酒$120，正價$192，大酒$1,700三支，逢星期日更加係全日歡樂時光價，其他日子凌晨兩點後一樣咁嘅價錢，抵飲到天光 o架。