全民開講金球獎之三：沙維更有資格 Give me Five

早幾年油尖旺有三間酒吧都叫「 Give me Five」，約人等真係要講清楚，否則好易去錯。不過，家就剩番得太子呢間，當然係夠實力至留得低啦！酒吧環境唔係好突出，同一般劈場差不多，大梳化、卡拉 OK、鏢機、足球直播樣樣齊，唔玩花巧，簡簡單單令人玩得更有親切感。當然酒吧仲有必殺技啦，就係平到你唔信嘅酒水，星期日至四全日都係收歡樂時光價，啤酒一 Set$108，真係夠晒吸引。至於星期五、六歡樂時光依然係$108，正價就$128，都比唔少場平$50有多 o架嘞。



■掟到 180分就可以留下高姓大名。


話晒劈場，拳手一定有。問到靚女之一嘅 Miki撐唔撐美斯做今屆球王？「梗係唔撐啦！佢係好波，不過都要巴塞個個好波佢先勁，睇佢喺阿根廷國家隊表現就即時無發揮，相比起沙維，聯賽又贏、世界盃又贏，佢更加應該得到呢項殊榮。」果然係識波之人，講得好到 Point，估唔到靚女都對足球咁有認知，真係人不可以貌相！仲有，佢手枚都好勁，唔信你嚟挑戰吓就知我無吹水。


■真係全日$108無呃你！



■唔一定係男士至鍾意掟鏢嘅，女士都有高手 o架。



■酒吧有不少掛牆電視，保證視線無遮擋。



■長方形格局，兩邊梳化位，設計簡約。


（地址：太子西洋菜街北 316號地下）