新年開運大法之四：拜完車公入馬場 A Cup of

大年初一，當然要同大家講聲恭喜發財，酒色財氣日日豐收！每逢年初一，唔少人都問我邊度有酒吧會開，講真，今日開工要三工，又真係好難搵到酒吧開門。不過，難不等於無，我就八到旺角嘅「 A Cup of」今日會照常營業，最啱我哋呢啲無時無刻都酒癮發嘅蒲友。至於酒水價錢方面，新春大吉，一樣無加你價，$168一 Set啤酒，大酒$680，最緊要大家開心！而且，老闆仲鬼咁有心思，入咗批兔仔收音機，只要飲夠 6 Set啤酒就送畀你。


唔好以為位處砵蘭街就一定品流複雜，其實呢間酒吧主打斯文客人路線，嚟 Clubbing嘅朋友，一般都睇吓直播足球、唱吓卡拉 OK呀咁，所以都有不少靚女客人支持，好似 Hester間唔中就會嚟飲吓嘢，問 Hester過年有乜開運心得，佢話：「每年年初三我都會同屋企去車公廟上炷香，轉吓風車，寓意事事順利！」啱晒嘞，我都係年初三去拜車公，開完運，又近近哋順便入埋馬場，發吓新年財，不如你畀個電話號碼我，今年約埋一齊去吖？點知靚女話：「我哋都係第一次見面，電話就唔畀嘞，不如睇吓到時有無緣見到再算啦！」呢個檸檬酸酸哋，不過，仲有希望，你唔好放我飛機吖。


■大投射播 MV、唱 K，都零舍有 Feel。



■可愛嘅兔仔收音機，送嘅。



■設計簡約， Clubbing至啱。



■呢度仲係間迷你火機博物館。


（地址：旺角砵蘭街 108號地下）