最愛新年食品之二：睇見廣告就想食 Hot Shot

尖沙嘴有不少環境出眾嘅靚場，但要數令人難忘嘅一定會係「 Hot Shot」，一入酒吧就會見到中間有個彎形大吧頭，而且仲有靚女 Bartender Zita幫大家教 Cocktail，酒吧再分左右兩邊設計。右邊主打飛鏢區，以高枱為主，有多部 Online鏢機；另外，還設有飛鏢配件櫃，特別要一提係佢哋個鏢櫃，舊式老老土土用木做，但加上玻璃門同射燈，靚仔好多之餘，搞到我都好想開番個櫃放私家鏢。酒吧左手邊就主打 Clubbing區，座椅用真皮梳化，坐得舒服；另有 VIP房，開 Party絕對有得諗。


環境如此完美，吸引男士撐場外，女士都一樣 Buy，好似阿 Miu就係熟客之一，一星期嚟唔夠 5日都話唔舒服。問吓阿 Miu新年最愛美食時，佢就幾乎數晒出嚟咁滯，「如果真係講一樣，就惟有撐嗰隻『藍色』曲奇啦！」
乜唔係啲年糕煎堆咩？「你知啦，新年啲親戚朋友拜年一定有手信，我最鍾意就係 Chok吓個盒係咪曲奇，係嘅話一定即刻拆嚟食，可能日日廣告都賣住，搞到個人都好想食啩！」又係廣告效應，不過，西式曲奇喺農曆新年又份外覺得好食嘅！

■彎形大吧頭好有吸引力！



■鏢機區範圍夠大，鏢機又多。



■可以嚟整支私家鏢。



■玻璃鏢櫃好有型！


（地址：尖沙嘴漆咸道南 53-55號嘉芙中心地庫）