新年開運大法之六：行善積德添好運 S18

今日大年初三，又係星期六，淨係講節目就超豐富，下午有馬仔跑，晚上又有波踢，祝各位今日橫財就手，一本萬利，贏大錢當然晚上請朋友飲酒最好添啦，地點方面，我就握介大家去「 S18」，事關雖然放年假，但仍然有不少靚女拳手同大家猜兩板，加上嚟過嘅朋友都知，地方夠大、坐得舒服，又有新 Online鏢機，就連大電視都有多部，娛樂硬件一定滿分先，酒水方面，大節日無加價，歡樂時光每桶啤酒$120，正價$198，大酒有優惠，禮拜日至四兩支$1,200，$2,097三支，而且仲有指定小食送畀你佐酒，有飲有食最好不過。


講完酒吧，就梗係要介紹今日靚女 Erica先得啦，個子細細嘅佢，原來做咗拳手無幾耐，大家同佢玩，記得讓吓佢，問到佢有乜開運心得，「想行好運，我覺得就一定要心地好，得閒就做多啲善事，見到有需要幫助嘅人都唔好吝嗇，幫到人自己又開心啲，好運自然來啦！」呀，估唔到後生女都咁識諗，不過，講到善事，逢星期三、六我都一定做，因為我都算超級黑仔王，成日輸錢畀馬會做善事，唔知又幾時輪到我行好運呢！「哈哈！你未算黑仔王，到家仲有得輸，其實你咪行緊運囉！」


■新款 Online鏢機，新年最好一班人搞個比賽搞吓氣氛。





■地方夠大，座位又多，人多睇波仲開心！



■吧頭掛上不少可愛獅子仔，勁有新年 Feel。


（地址：尖沙嘴漆咸道南 53-55號嘉芙中心 3樓）