$6,000點使之七：買條隧道最好 FeeFee Club

最近因為$6,000全城都鬧得熱烘烘，有人話唔應該畀，有人話點解我無份，有人歡笑有人愁，但係我一於少理，有得分就梗係要啦，話晒我都係納稅人，啲錢我有份畀，應得嘅！但係「 FeeFee Club」 Promoter Hidy就同我嘅諗法啱啱相反，「咁派法一定派突啦，我就唔贊成人人派錢嘞，我寧願政府拎呢筆錢去買番條東隧、西隧，或者買多啲港鐵股權，咁以後啲公共交通咪唔使成日加價囉，市民仲受惠啦！」咁做唔係唔好，不過，多數人都唔會諗到咁長遠 o架嘞，而且，梗係現兜兜袋袋平平，感覺最實際 o架啦！




■每晚 10點後都有 Live Band表演。


不過，我都好佩服靚女咁有遠見，為表心意，一於幫佢 Order番支酒。講開酒，其實嚟呢度蒲，聽住 Live Band唱歌，都總係覺得飲住大酒先最夾，搞笑啲講，好嘅歌聲真係可以令啲酒都甜啲，難怪大家都咁有醉意咁。除咗 Live Band，呢度一樣有鏢機同 VIP房，房內有獨立卡拉 OK，聽人唱又得，自己唱又得，呢間吧撐得過！



■啤酒選擇多，最啱有要求嘅你。




■大廳夠人氣，個個都俾 Live Music吸引住。




■埋邊仲有鏢機，新舊款式一應俱全。




■ VIP房夠大之餘，仲裝修得好靚。


（地址：尖沙嘴堪富利士道 12號地庫）